LIBURU TXOKOA
Liburu Txokoa: Irudimena eta Irakurzaletasuna Pizteko Gunea
Liburua altxor preziatua da, hezkuntza integralerako oinarrizko zutabea eta gure kulturaren transmisio tresna paregabea. Hori dela eta, Haurtzaro Ikastolan Liburu Txokoa dugu: haurrentzat pentsatutako gune berezi bat, non hitzak, ilustrazioak eta istorioak protagonista nagusiak diren.
Lehen urratsak: txikienen aurkikuntza
Heldu baten laguntzarekin, txikienek eremua modu lasai eta erosoan erabili ahal izango dute, liburuen orrialdeen artean murgildu eta istorioez gozatzeko. Gure helburua irakurzaletasuna piztea da hasiera-hasieratik: haurrak txiki-txikitatik liburu artean ohitu, haiekin jostateko eta gozatzeko, liburuak lagunak direla sentitzeko. Ukitu, begiratu, entzun… zentzumen guztiekin bizi dezatela irakurketaren esperientzia.
Hazteko bidean: zaletasunaren hazkundea
Adinean aurrera egin ahala, zaletasun hori elikatu eta indartu nahi dugu. Nola? Irakurketaren afizioa ohitura natural bihurtuz, ibilian-ibilian. Poliki, haurrek autonomia handiagoa eskuratuko dute, eta Liburu Txokoan gozatzera heltzeko gai izango dira berez, beren kabuz.
Liburu Txokoa ez da soilik gelako txoko bat. Hezkuntza proiektu bat da, non irakurketa ardatz hartzen dugun pentsamendua garatzeko, hizkuntza aberasteko, emozioak lantzeko eta munduari buruzko jakin-mina pizteko. Hemen, istorio bakoitzak ate bat irekitzen du: beste mundu, beste kultura eta beste esperientzia batzuk ezagutzeko aukera paregabea.
Ongi etorri gure Liburu Txokora, non orri bakoitzak abentura berri bat ezkutatzen duen!
Funtzionamendu orokorra:
Haurrak beti heldu baten laguntza izan beharko du liburu txokora joateko. Arduraz eta mimoz jokatzea eskatzen da, espazioan giro goxo eta atsegina bermatu ahal izateko.
KUDEAKETA
Liburu txokoa erabili ahal izateko sarreran helduaren datuak osatu eta eremua behar bezala zaindu. Erabilera amaitu ondoren, espazioa topatu moduan uzten dela ziurtatu.
Espazio honen erabilera astelehen, asteazken eta ostegunetan 8:00-9:00 bitarte izango da eta 16:30etatik 17:15etara.
Sarrera-irteerak Idazkaritzako atetik.
ARGI HIZKIAK: Irakurketaren Argia Pizteko Egitasmoa
Urriaren 24an, Liburutegien Nazioarteko Eguna ospatzeko, “Argi hizkiak” izeneko egitasmo berezia jarri dugu abian Ikastolan. Ekimen honek helburu argi bat du: irakurketarekin gozatzeko esperientzia sortzea eta irakurzaletasuna bultzatzea gure ikasleen artean.
Zergatik “Argi hizkiak”?
Hizki bakoitza argi bat da. Argi txiki bat, baina indartsua. Elkarrekin batzen direnean, hitzak sortzen dituzte; hitzek esaldiak; esaldiek istorioak; eta istorioek… munduak. “Argi hizkiak” egitasmoak argi horiek pizten ditu gure haur eta gazteen baitan, irakurketaren bitartez sortzen den maiaren, irudimen eta jakin-minaren distira.
Nola funtzionatzen du?
Astero, bi liburu gomendio egingo ditugu. Adin tarte desberdinetarako hautatutako liburuak izango dira, irakurle bakoitzak bere neurrian gozatzeko aukera izan dezan. Gomendio hauek gure Liburu Txokoan eta webgunean eskuragarri egongo dira, eta familia guztiei buletinaren bidez hedatuko zaizkie.
Mimo handiz prestatutako ekimena
Ikasturte berri honetarako, mimo eta ilusioz prestatzen dugu egitasmo hau. Ez da ekimen puntual bat bakarrik; ibilbide bat da, non irakurketa bizipena izatea nahi dugun, ez betebehar bat. Liburuak gure lagun bihurtzen dira, eta irakurtzea plazer eta aurkikuntza iturri.
Urriaren 24an hasten dugun bidaia honetan, liburu guztiek dute tokia: ipuinetatik hasi eta poesia liburuetara, komikietatik nobelaraino. Hizkuntza guztiek ere badute lekua, baina bereziki gure euskarak, kultura eta nortasunaren jabe egiten gaituen hizkuntza.
Gonbidapena
“Argi hizkiak” egitasmoak dei egiten die familiei eta ikasleei: elkarrekin sortzen dugu irakurzale komunitate bat, non orri bakoitzak argi berri bat pizten duen.
Zatoz gurerekin irakurketaren argira!
